حنبورتو طول السنة بس مش المهم نشرب!

طيب بالنسبة اننا دولة عندها أزمة ميه ومبقاش البورتو فيها على البحر بس..ده بقى بيتعمل بحيرات صناعية ويتبني كومباوند سكني حواليها عشان الناس تبورتو طول السنة..ويتعمل ملاعب جولف..هو أينعم معندناش ناس كثير بتلعب جولف..بس برضو فيه ناس بتحب تسكن قدام ملعب جولف عشان تستمتع بالمنظر..
طبعا أنا مش معترض انك تسكن قدام ملعب جولف..أو انك تعيش وقدامك بحيرة صناعية..لكن هل معقول ان كميات المية اللي هي أقل من الكمية اللي محتاجنها كمان نضيعها في بحيرات صناعية وملاعب جولف..
في كتاب (العوملة) لدكتور جلال أمين كان بيتكلم على ان الزعيم الصيني ماو تسي تونج كان بيعتبر ان لعبة الجولف فيها (انحلال اخلاقي) وكمان كان مانعها..مبرره لده كان ان ملعب الجولف بيتعمل على مساحات كبيرة من الأرض وكمان بيستهلك كميات هائلة من الميه وفي النهاية اللي بيتمتع بها عدد قليل جدا من الأثرياء..
طبعا ولا باقول نمنع الجولف ولا نمنع اللي عايز يبني كومباوند أو قرية سياحية..بس المهم هل الدولة عندها خطة لترشيد استهلاك الميه؟ هل فيه الزام للشركات اللي حتبني ملاعب جولف وبحيرات صناعية انها تبني محطات تحلية مياه البحر مثلا أو يكون على الأقل ميه غير صالحة للشرب أو للزراعة..عشان ميجيش اليوم اللي نبقى حنموت فيه من العطش أو الجوع بس قاعدين نتفرج على ملاعب جولف وبحيرات صناعية..

هم #ذوي_الاحتياجات_الخاصة عايزين ايه؟

ذوي الاحتياجات الخاصة أخر حاجة محتاجينها من البلد ومن اللي عايشين حواليهم انهم يتعاطفوا معاهم..هم مش محتاجين تعاطفنا..هم محتاجين اننا منحطلهم عراقيل ادامهم تمنعهم انهم يمارسوا حياتهم زي أي انسان طبيعي..

يعني متحطلهمش عربيتك وتطلع كراسي محلك على الرصيف..يعني لما تيجي تبني بيت أو مستشفى تعمل مكان جنب السلم يقدر الشخص اللي بيستخدم كرسي يستخدمه في الطلوع والنزول..يعني لما تبقى مسئول وتيجي تعمل لائحة متمنعش الكفيف أو اللي عنده اعاقة من انه يكمل دراسته بحجة سلامة الحواس..انك لما تبقى صاحب دار نشر أو حتى وزير ثقافة تحاول توفر كتب بطريقة برايل أو نسخ الكترونية يقدروا يقرأوها..هو ده اللي منتظرينه منك

كل اللي محتاجينه اننا ندمجهم في المجتمع ونبطل نحط عراقيل وعقبات ادامهم تصعب عليهم ممارستهم لحياتهم..الشخص اللي من ذوي الاحتياجات الخاصة زيه زي اي مواطن تاني..من حقه يأخد حقوقه كامله..من حقه انه يحس انه بيشتغل وبينتج وان له دور في المجتمع اللي هو عايش فيه..ده اللي هو محتاجه..لكن انك تحبسه في البيت وتمنعه من الدراسة والعمل وفي الأخر تقوله انك متعاطف معاه..انت كده بتقتله.

الطبيعة..أخر ما تشغل اهتماماتنا.. (مواقف من تركيا وبريطانيا ومصر)

ايه اللي حصل في تركيا؟! اللي حصل في تركيا ان الحكومة قررت تبني مشروع تجاري على حديقة غازي العامة..فالمواطنين الأتراك نزلوا يتظاهرا احتجاجا على قرار الحكومة وبدأ الأمن في استخدام العنف لتفريق المتظاهرين..بس ده مش أول مرة يحصل موقف زي ده..كنت باقرأ كتاب (العولمة) لدكتور جلال أمين وكان كاتب عن قصة مشابهة حصلت في دولة أوروبية برضو..

باختصار..في بريطانيا وتحديدا في مدينة (بريستول)..شركة تجارية اسمها (تسكو) قررت تشتري قطعة أرض عشان تبني عليها سوبرماركت..المشكلة ان قطعة الأرض ده كانت في منطقة غابات رائعة الجمال..وعشان الشركة تبني فيها المشروع التجاري اللي عايزه تعمله حتقطع أشجار رائعة الجمال عمرها 89 سنة ده غير ان بمجرد حيتبني السوبرماركت ده أكيد الشركة حتحتاج تعمل موقف انتظار سيارات جنبه ومش بعيد كمان شركات تانية تقرر تبني في نفس المنطقة وتتقطع المزيد من الأشجار وتتحول الطبيعة الجميلة الى منطقة قبيحة فيها كل أنواع التلوث..طبعا الشباب الانجليزي اعترض على المشروع وقرروا يحتلوا قطعة الأرض ده..جهزوا نفسهم وراحوا على هناك عشان يمنعوا الشركة من اتمام مشروعها وعملوا نوبات حراسة للأرض على مدار ال24 ساعة..الشركة لجأت للقضاء وأخدت حكم ان الأرض من حقها..والأمن بدأ يتحرك تجاه الأرض لتنفيذ الحكم..طبعا الشباب هناك قرروا ميستسلموش وطلعوا فوق الأشجار عشان يمنعوا قطعها وباتوا عليها واستحملوا الأمطار اللي نزلت عليهم وهم فوق الشجر..بعد 28 ساعة مقدروش يصمدوا أكثر من كده خاصة بعد ما الأمن اعتقل بعضهم وقرروا ينسحبوا من الأرض..شركة (تسكو) بعد كده قررت تحسن من صورتها فوعدت الناس انها حتزرع أشجار وانها حتهتم بالبيئة وانها حتقدم خدمات جديدة للمدينة وكلام من هذا القبيل..

في مصر برضو ممكن يتكرر نفس الموقف ده لأن الحكومة ناوية تبني جسر بين مصر والسعودية والجسر ده عشان يتبني حيتسبب في تلوث البيئة وحيقضي على الكائنات البحرية والشعب المرجانية اللي في المنطقة ده..طبعا لما بتحاول تعترض في مصر على بناء الجسر بسبب اضراره على البيئة الناس بتبصلك على أنك شخص مجنون!! انت خايف على الطبيعة وعايز تمنع بناء جسر -على قول الحكومة- حيدخل مليارات للدولة..وطبعا اللي بيقول كده مش عارف ان الشعب المرجانية والكائنات البحرية النادرة ده قيمتها تقدر بمليارات برضو وبعيدا عن القيمة المادية لها..ده الطبيعة اللي ربنا انعم علينا بها..وتدميرنا للبيئة بالصورة اللي بتحصل ده في كل دول العالم معناها القضاء على الحياة على كوكب الأرض..

الملاحظة الأخيرة..احنا شعوب طيبة وغلبانة..تخيلوا لما نفضل ندفع ضرايبنا عشان ندفع مرتبات أجهزة الأمن وفي النهاية نلاقي ان الأمن تقتصر مهمته على ضرب الشعوب وحماية المشاريع التجارية اللي حتخلي مجموعة صغيرة جدا من الناس حتزيد أرباحها في البنوك بضعة مليارات..غلابة احنا والله

عن منصب في مصر اسمه وزير البيئة

أنا خلاص عرفت ان مرسي مبيعملش حاجة غير انه يسافر يجيب قروض ويقعد يتابع مين بيقول ايه فين ومين قاعد في الحارة المزنوقة..وعرفت ان هشام قنديل بيأخد قرارات ويخلي مرسي يرجع فيها وبيلعب السنافر في وقت فراغه..اللي عمري ما فهمت ايه دوره في مصر هو وزير البيئة..مش بس وزير البيئة الحالي لأ ده كل وزير بيئة بيتعين مبنعرفش اسمه ولا نشوف شكله ولا بنلاقي أي حاجة بيعملها..

عندنا كل أنواع التلوث..عندنا اكوام الزبالة في كل شارع في مصر..عندنا تعديات على النيل..عندنا تبوير للأراضي الزراعية وتراجع في عدد الأراضي الخصبة حول النيل..عندنا اشجار بتتقطع بدل ما نزرع اشجار جديدة..عندنا مصانع بتلوث البيئة وبتجيب للناس امراض تصل الى الاصابة بالسرطان وكلها بيبقى معاها جواب من البيئة ان شغلها سليم..وكأننا بنعين واحد عشان يوافق على كل المشاريع اللي بتلوث البيئة..

كان (أل جور) في الفيلم الوثائقي (An Inconvenient Truth) بيتكلم ان برضو في أمريكا عينوا واحد في منصب متعلق بالبيئة لكن مكنش عنده أي خبرة في المجال ده لدرجة انه بعد ما ترك منصبه راح اشتغل في شركة للبترول يعني في المجال اللي هو اصلا بيلوث البيئة..وساعتها اقتبس مقوله ل (Upton Sinclair) بتقول : "It is difficult to get a man to understand something, when his salary depends upon his not understanding it!"

عن مونسانتو (سؤال وجواب للي مش فاهم فيه ايه)

عن مونسانتو: (سؤال وجواب للي مش فاهم ايه اللي بيحصل)
--------------------------------------------------------------------------
مين مونسانتو؟
مونسانتو شركة بتحتكر بذور الذرة المعدلة وراثيا..

طيب ايه المشكلة؟
-المشكلة ان بذور الذرة المعدلة وراثيا الأبحاث العلمية والتجارب اللي اتعملت على الفئران أكدت انها بتصيب اللي بيأكلها بالسرطان.

-تاني مشكلة ان الشركة بتحتكر البذور وبتفرض على الفلاح انه يزرعها مرة واحدة وميقدرش الفلاح حتى انه يحتفظ بجزء من البذور عشان يزرعها بعد كده..يعني من الأخر الفلاحين في كل انحاء العالم اللي بيستخدموا البذور المعدلة وراثيا حيبقوا تحت رحمة الشركة..

يا عم هو الفلاح يعني حيغلب..ما حيتصرف من وراهم؟!
لأ..شركة مونسانتو عندها فريق تحقيقات..بينزلوا يراقبوا الفلاحين ويتأكدوا لو الفلاح احتفظ بجزء من البذور وحتى يتأكدوا من بقية الأراضي ان الفلاحين اللي فيها مزرعوش من بذورهم من وراهم أو حتى يتأكدوا ان مفيش بذور الرياح حركتها لأراضي أحد الفلاحين اللي مش متعاقد معاهم..وبيرفعوا قضايا على  أي فلاح يلاقوه خالف شروطهم ويطالبوا بتعويضات تكون كافية ان الفلاح ده يفلس ويتخرب بيته..

طب ما يقفلوها يا عم طالما مضرة كده؟
للأسف شركة مونسانتو لها نفوذ قوي في أمريكا خلاها حتى تقدر تطلع تشريع من الكونجرس يحميها ويخليها تزرع محاصيلها براحتها من غير ما أي حد يقدر يسيطر عليهم..

للدرجة ده؟! طب الناس عملت ايه؟
النشطاء ومنظمات المجتمع المدني عملوا حملات توعية للناس يحذروهم من بذور مونسانتو وكمان حاولوا يجبروا الشركة انها تلتزم باعلان اسماء المنتجات اللي بتستخدم بذورهم و ان يبقى مكتوب على المنتج انه داخل في صناعته مكونات معدله وراثيا لكن للأسف نفوذ الشركة زي ما قلنا خلاها تقدر تصرف ملايين عشان تحسم التصويت لصالحها بحجة ان الكتابة على أي منتج انه معدل وراثيا حيخوف المستهلكين والشركات حتضرر كده!!

طب انت مصدعنا ليه..انت مش بتقول ده شركة أمريكية والحوار ده كله حصل في أمريكا..احنا مالنا بقى يا عم انت؟!!
للأسف..نفوذ الشركة خلاها تدخل بلاد كثير مش بس أمريكا..وقدروا يدخلوا شحنات من بذورهم داخل مصر..والخطورة ان الذرة بيدخل في صناعات كثير..من أول علف الحيوان ورغيف العيش لغاية البسكوتات والحلويات اللي ممكن تشتريها لأطفالك من السوبرماركت لدرجة ان اللي حيدور على الانترنت حيلاقي شركات كثير معروفة من اللي بنشتري منتجاتها فيه شكوك حواليها انها بتستخدم البذور ده..

طب حنعمل ايه؟!
اللي حنعمله ان كل واحد عرف خطورة البذور ده لازم يعرف الناس..وفيه دلوقتي حملات ومسيرات بتنزل في اغلب دول العالم ضد مونسانتو..كل ده حيقدر يجبر الحكومات انها تمنع الشركة ده من دخول بذورها داخل بلادنا..وكمان الشركات اللي كانت بتستخدم مكونات معدلة وراثيا وحتلاقي ان الشعوب بقت رافضه منتجاتهم حيتراجعوا عن استخدامهم للمكونات ده ويرجعوا تاني يستخدموا بذور مفيش خطورة منها..

طاقة متجددة VS طاقة نووية..تجارب الدول المتقدمة في الطاقة المتجددة

صحينا في يوم ولقينا خبر زيارة د.مرسي الى روسيا وطلبه التعاون مع روسيا في مجال الاستخدام السلمي للطاقة النووية ..وتحديدا في منطقة الضبعة اللي كان مبارك حددها لبناء مفاعل نووي فيها..بعد الثورة وتحديدا اثناء تولي المجلس العسكري الحكم حصل اقتحام من الأهالي لأرض الضبعة وحصل اشتباكات بين الجيش والأهالي وحصل اقتحام لبعض المباني الموجودة في الأرض..يعني ببساطة فيه أزمة على الأرض ولغاية دلوقتي متحلتش..

أكيد احنا عندنا أزمة في توليد الكهرباء نتيجة عجز الدولة في توفير السولار الكافي لاحتياجاتنا..وفي أحد برامج التوك شو تناولوا موضوع بناء سد النهضة في أثيوبيا وذكر أحد الضيوف انه اثناء فترة بناء السد حيقل منسوب المياه في نهر النيل وده حيؤدي لصعوبة في توليد الكهرباء من السد العالي..في كل الأحوال احنا عندنا أزمة في الطاقة..الأزمة ده حتظهر في انقطاع للكهرباء في البيوت أو حتقف عائق أمام المستثمر في مصر اللي حيجد صعوبة في الحصول على الطاقة اللازمة لتشغيل مصنعه..

الحل اللي مبارك كان بيرتب له واللي مرسي برضو بيفكر فيه هو بناء مفاعل نووي..لكن فيه دول تانية شافت ان الحل مش في الطاقة النووية لكن فيه الطاقة المتجددة..

مثلا:
1- طاقة الرياح: دولة زي الدنمارك بتستهدف توفير 50% من الكهرباء من طاقة الرياح..وبتخطط انها تصل في سنة 2020 انها تحصل على 35% من احتياجاتها من الطاقة من مصادر للطاقة المتجددة وبتستهدف في سنة 2050 ان 100% من الطاقة تحصل عليها من مصادر للطاقة المتجددة..

2- الطاقة الشمسية: دائما في كتاب الدراسات الاجتماعية كنا بنحفظ جملة ان مصر تتمتع بجو معتدل وتسطع فيها الشمس طوال العام لكن لغاية دلوقتي مستفدناش من موضوع الشمس الساطعة ده..لكن دولة زي المانيا حققت رقم عالمي..محطات الطاقة الشمسية في المانيا تنتج 22 جيجاوات كهرباء في الساعة وهي تساوي الطاقة اللي بتولدها 20 محطة طاقة نووية تعمل بكامل طاقتها..

3- توليد الكهرباء من القمامة: تمشي في شوارع مصر تلاقي الزبالة في كل حته لدرجة انك بتضطر تعدي الشارع عشان تعرف تمشي..لكن تتصدم لما تلاقي دولة زي السويد عندها أزمة بسبب نقص القمامة..السويد بتعتمد على القمامة في توليد الكهرباء ونتيجة نقص القمامة عندهم اضطروا انهم يفكروا في استيراد قمامة من النرويج ..وطبعا مش السويد بس اللي بتستخدم القمامة في توليد الكهرباء..فيه دول تانية زي سنغافورة وتركيا بيستفيدوا من القمامة في توليد الكهرباء.. ده فيديو بيشرح عملية توليد الكهرباء من القمامة في تركيا (شاهد من الدقيقة 10:55)..

لو عملنا مقارنة بسيطة بين الطاقة النووية والطاقة المتجددة..حنلاقي ان الطاقة النووية بتسبب تلوث..بينتج عنها نفايات نووية بتسبب سرطان..ده غير مستوى مرتفع من الخطورة لو حصل انفجار للمفاعل سواء نتيجة اهمال أو نتيجة كارثة طبيعية زي ما حصل في اليابان..

السؤال بقى..لو اللي في السلطة عنده رؤية للمستقبل..هل يتجه لمصادر الطاقة المتجددة واللا للطاقة النووية؟

الصكوك الاسلامية وعقدة ال200 مليار

الصكوك الاسلامية وعقدة ال200 مليار:
---------------------------------------------
دائما كان الاخوان بيطلعولنا بأي افتكاسة كده من بعد الثورة ويوعدوا الناس ان فيه مليارات جاية لمصر قريب ويزغللوا عين الشعب بها..ومش عارف ايه الحكمة انه دائما كان بيبقى المليارات اللي جايه مصر حتبقى 200 مليار..

فمثلا د.مرسي قبل الانتخابات قال ان فيه  15 شركة عالمية جاهزه لضخ 200 مليار في مصر وادي الانتخابات خلصت والدستور اتعمل ومشفناش حاجة من ال200 مليار..وجه بعدها حزب الحرية والعدالة بفكرة الصكوك الاسلامية وعلى طول طلعلنا احد اعضاء التأسيسية وعضو مجلس الشورى د. حسين حسان ان 200 مليار دولار حتدخل مصر عن طريق الصكوك الاسلامية ..المشكلة اننا شعب طيب وكل مرة بنصدق..والناس اليومين دول بتعمل شير لكلامه وكأن ال200 مليار ده كلها استثمارات والبلد حتتغني وحتى مش بتركز في كلامه انها مصادر تمويل مش استثمارات..

أولا ايه هي الصكوك الاسلامية..ببساطة الصكوك الاسلامية هي أداة من أدوات التمويل للحكومة..يعني مثلا الحكومة عايزه تبني مدارس أو مستشفيات بمليار جنيه..وعندها عجز في السيولة فتعمل ايه؟ تصدر صكوك والشركات تبتدي تشتري الصكوك ده والشركات ده تبتدي تموّل بناء المدارس أو المستشفيات والحكومة تبقى كأنها مأجراها منها وتفضل طبقا للجدول المتفق عليه تسدد المليار جنيه وفوقهم طبعا الأرباح لغاية ما الشركة أو حامل الصك يبقى أخد كل فلوسه تبقى ساعاتها المدارس ملك الحكومة..

طيب ده معناه ايه؟ معناه ان ال200 مليار اللي بيزغللوا بهم عينين الشعب دلوقتي مش استثمارات ده ديون حتبقى على مصر..يعني لو فيه 200 مليار فعلا وده رقم مبالغ فيه جدا لأن أصلا حجم الصكوك الاسلامية في العالم في 2011 كان 85 مليار لكن لو اعتبرنا ان رقم ال200 مليار صحيح يبقى معنى كده ان مصر حتبقى مطالبه بسداد (200 مليار + الأرباح) للشركات وحاملي الصكوك..يعني المستفيد حيبقى الشركات ولأننا لسه مش عارفين القانون حيبقى شكله ايه فلسه مش عارفين كمان اذا كانت الصكوك ده حتباع للمصريين فقط واللا كمان الأجانب حيبقى لهم حق شراءها..

ده تصريح وزير المالية والمهم فيه انه لما اتكلم عن الصكوك الاسلامية قال مصادر تمويل مش استثمارات 

يعني من الأخر كل تفكير الحكومة وكل تفكير الاخوان منحصر في الحصول على قرض من صندوق النقد أو اصدار اذون خزانة أو اصدار صكوك اسلامية وكل ده تعتبر زيادة على الدين العام اللي مش حنبقى عارفين نسدده بعد كده..