الصكوك الاسلامية وعقدة ال200 مليار

الصكوك الاسلامية وعقدة ال200 مليار:
---------------------------------------------
دائما كان الاخوان بيطلعولنا بأي افتكاسة كده من بعد الثورة ويوعدوا الناس ان فيه مليارات جاية لمصر قريب ويزغللوا عين الشعب بها..ومش عارف ايه الحكمة انه دائما كان بيبقى المليارات اللي جايه مصر حتبقى 200 مليار..

فمثلا د.مرسي قبل الانتخابات قال ان فيه  15 شركة عالمية جاهزه لضخ 200 مليار في مصر وادي الانتخابات خلصت والدستور اتعمل ومشفناش حاجة من ال200 مليار..وجه بعدها حزب الحرية والعدالة بفكرة الصكوك الاسلامية وعلى طول طلعلنا احد اعضاء التأسيسية وعضو مجلس الشورى د. حسين حسان ان 200 مليار دولار حتدخل مصر عن طريق الصكوك الاسلامية ..المشكلة اننا شعب طيب وكل مرة بنصدق..والناس اليومين دول بتعمل شير لكلامه وكأن ال200 مليار ده كلها استثمارات والبلد حتتغني وحتى مش بتركز في كلامه انها مصادر تمويل مش استثمارات..

أولا ايه هي الصكوك الاسلامية..ببساطة الصكوك الاسلامية هي أداة من أدوات التمويل للحكومة..يعني مثلا الحكومة عايزه تبني مدارس أو مستشفيات بمليار جنيه..وعندها عجز في السيولة فتعمل ايه؟ تصدر صكوك والشركات تبتدي تشتري الصكوك ده والشركات ده تبتدي تموّل بناء المدارس أو المستشفيات والحكومة تبقى كأنها مأجراها منها وتفضل طبقا للجدول المتفق عليه تسدد المليار جنيه وفوقهم طبعا الأرباح لغاية ما الشركة أو حامل الصك يبقى أخد كل فلوسه تبقى ساعاتها المدارس ملك الحكومة..

طيب ده معناه ايه؟ معناه ان ال200 مليار اللي بيزغللوا بهم عينين الشعب دلوقتي مش استثمارات ده ديون حتبقى على مصر..يعني لو فيه 200 مليار فعلا وده رقم مبالغ فيه جدا لأن أصلا حجم الصكوك الاسلامية في العالم في 2011 كان 85 مليار لكن لو اعتبرنا ان رقم ال200 مليار صحيح يبقى معنى كده ان مصر حتبقى مطالبه بسداد (200 مليار + الأرباح) للشركات وحاملي الصكوك..يعني المستفيد حيبقى الشركات ولأننا لسه مش عارفين القانون حيبقى شكله ايه فلسه مش عارفين كمان اذا كانت الصكوك ده حتباع للمصريين فقط واللا كمان الأجانب حيبقى لهم حق شراءها..

ده تصريح وزير المالية والمهم فيه انه لما اتكلم عن الصكوك الاسلامية قال مصادر تمويل مش استثمارات 

يعني من الأخر كل تفكير الحكومة وكل تفكير الاخوان منحصر في الحصول على قرض من صندوق النقد أو اصدار اذون خزانة أو اصدار صكوك اسلامية وكل ده تعتبر زيادة على الدين العام اللي مش حنبقى عارفين نسدده بعد كده..

عندما يصبح المتحدث باسم نتنياهو ناقدا فنيا!!

اوفير جيندلمان (المتحدث الرسمي باسم رئيس الوزراء الاسرائيلي نتنياهو) بقى ناقد فني وبيكتب تويتات عن رأيه في مسلسلات وبرامج رمضان..تنفع نكتة برضو أو حاجة نتريأ عليها..

افيخاي ادرعي (المتحدث الرسمي باسم الجيش الاسرائيلي) بيكتب رأيه عن مسلسلات رمضان..أه ممكن نتريأ برضو زي ما اتريأنا على اللي قبله..

بس هو الموضوع مش مضحك لما تبقى ده أكاونتات رسمية مش مجرد أراء شخصية لاثنين من اسرائيل..يعني هل يعقل ان واحد يكون بينقل أخبار رئيس الوزراء وبيتكلم باسمه يكون بالصدفة كده بيكتب رأيه في مسلسل عربي وبيكتب رأيه فيه..يعني عشان نقرب الصورة كده..هل ممكن ياسر علي (المتحدث الرسمي باسم رئاسة الجمهورية) نلاقيه طالع بيتكلم عن مسلسل في نفس الأكاونت أو نفس الوسيلة الاعلامية اللي بينقل منها أخبار رئيس الجمهورية؟! أكيد لأ

طب هل ده طبيعي ان المتحدث الرسمي باسم الجيش الاسرائيلي يكتب رأيه في مسلسلات رمضان في نفس الأكاونت اللي بيكتب فيه أخبار الجيش الاسرائيلي وتحركاته..نفس الأكاونت اللي كان بيكتب فيه بيانات رسمية عن اللي بيحصل في رفح وتفجير المدرعات المصرية قبل ما توصل معبر كرم أبو سالم وكان وسائل الاعلام بتنقل الأخبار منه؟! مش طبيعي صح

بشوية تفكير..حتلاقي ان اسرائيل متابعه كل حاجة عننا..مش بس أخبارنا..مش بس بيتابعوا تحركات الشخصيات العامة..لأ كمان بيتابعوا الأعمال الفنية والبرامج والاعلانات..كل حاجة كل حاجة..ومش بس بيتفرج..لأ ده بيعين ناس تكلمك بالعربي وتقولك رأيها في كل حاجة تخصك..وتحاول تفتح معاك حوار عشان يقنعوك بوجهة نظر "اسرائيل"..

لما شفت كل ده بيحصل وسألت السؤال احنا فين من كل ده وازاي احنا كمان مش بنتابع اللي بيحصل في اسرائيل..لقيت رأيين مختلفين عت بعض جدا..اللي يقوللي اسرائيل معندهاش ثقافة وبتسرق ثقافتنا واللي اعتبر ان ده نوع من التطبيع..ومن ناحية تانية لقيت اللي مش شايف اي مشكلة من نشر اعمال فنية اسرائيلية وان منع نشرهم ده جهل..

عن نفسي..ِشايف ان الرأي الأول اللي بيخاف يقرب من أي حاجة اسرائيلي احسن ده يبقى تطبيع ده رأي غلط..لأننا فضلنا كده طول السنين اللي فاتت لغاية ما بقت اسرائيل بالنسبة لنا مجهول..وبالنسبة للرأي الثاني اللي شايف ان مفيش أي مشكلة مع نشر الأعمال الفنية والأدبية لاسرائيل فبرضو انا ضده لأن مثلا مش ممكن حافتح قناة مصرية فحلاقي مسلسل أو فيلم اسرائيلي معروض عليها عادي كده..

وعشان أوضح رأيي..اسرائيل بالنسبة لي عدو..اسرائيل دولة محتلة..قتلت آلاف الأطفال والنساء..قتلت مدنيين عزل..وعشان هي عدو فلازم اعرف عنهم كل شئ..اعرف اخبارهم..اعرف بيفكروا ازاي..اعرف حتى لما بيتكلموا علينا كمصريين وكعرب بيقولوا ايه..ازاي حتهزم عدوك من غير ما تعرف عنه أي حاجة؟! ده يوم ما فريق كورة عندنا بيلاعب فريق من دولة ثانية بتلاقي اغلب قنوات التليفزيون مخصصة برامج بالساعات عشان تعرض لنا اغلب مباريات الفريق ده وكل المعلومات عنه..فما بالك بقى لما احنا بنتكلم على دولة حاربتنا واحتلت ارضنا ومازالت محتلة لأرض عربية وجرائمهم كل يوم بتزيد وكل يوم بيحاولوا يكملوا في مشروعهم لتهويد القدس وهدم المسجد الأقصى..ومع ذلك ممكن لو سألت نفسك واللي حواليك اسئلة بسيطة عن اسرائيل حتلاقي نفسك واللي حواليك مش عارفين اي حاجة عنها؟!

مش كفاية اننا نقعد نقول شعارات ضد اسرائيل ومش كفاية اننا نقعد ندعي عليهم..اسرائيل بالنسبة لنا عدو مجهول..محتاجين نعرف كل حاجة عنه..محتاجين نعرف ايه نقاط ضعفه عشان نعرف ازاي نهزمه.

احفظ كل يوم آية واعرف معناها..سورة عبس

السلام عليكم..

ده ثالث تدوينة لنفس الفكرة اللي كلمتكم عنها قبل كده " احفظ كل يوم آية واعرف معناها " وملخصها اننا نحفظ كل يوم آية أو أكثر كل يوم حسب طول الآيات ومعرفة تفسيرها وكان في التدوينة الأولى قسمت لكن سورة النبأ على عدة أيام وبعدها في تدوينة " احفظ كل يوم آية واعرف معناها..سورة النازعات " كنت قسمت فيها سورة النازعات..

في التدوينة ده ان شاء الله حاقسم لكم سورة عبس على 9 أيام وحتلاقوا حفظها سهل جدا ان شاء الله وحتعرفوا تفسير الآيات كمان..

اليوم الأول: سورة عبس..الآيات من 1 الى 4 وتفسيرهم

اليوم الثاني: سورة عبس..الآيات من 5 الى 10 وتفسيرهم

اليوم الثالث: سورة عبس..الآيات من 11 الى 16 وتفسيرهم

اليوم الرابع: سورة عبس..الآيات من 17 الى 20 وتفسيرهم

اليوم الخامس: سورة عبس..الآيات من 21 الى 23 وتفسيرهم

اليوم السادس: سورة عبس..الآيات من 24 الى 26 وتفسيرهم

اليوم السابع: سورة عبس..الآيات من 27 الى 32 وتفسيرهم

اليوم الثامن: سورة عبس..الآيات من 33 الى 37 وتفسيرهم

اليوم التاسع: سورة عبس..الآيات من 38 الى 42 وتفسيرهم

حاولوا تشجعوا نفسكم على حفظ القرآن وشجعوا اهلكم واصحابكم كمان..وكل سنة وانتم طيبين..رمضان كريم D:

احفظ كل يوم آية واعرف معناها..سورة النازعات

السلام عليكم..

استكمالا للتدوينة الأولى احفظ كل يوم آية واعرف معناها واللي كان فيها شرح للفكرة اننا نحفظ كل يوم آية أو أكثر على حسب طول الآيات ونقرأ تفسيرهم وكان في التدوينة الأولى تقسيم لآيات سورة النبأ على 10 أيام..ف الحمد لله أنا قدرت احفظ سورة النازعات ثاني سورة في الجزء الثلاثين..ف ححط لينكات بتقسم سورة النازعات على 11 يوم عشان تساعد أي حد عايز يحفظ..

اليوم الأول: سورة النازعات..الآيات من 1 الى 5 وتفسيرهم

اليوم الثاني: سورة النازعات..الآيات من 6 الى 9 وتفسيرهم

اليوم الثالث: سورة النازعات..الآيات من 10 الى 14 وتفسيرهم

اليوم الرابع: سورة النازعات..الآيات من 15 الى 17 وتفسيرهم

اليوم الخامس: سورة النازعات..الآيات من 18 الى 22 وتفسيرهم

اليوم السادس: سورة النازعات..الآيات من 23 الى 26 وتفسيرهم

اليوم السابع: سورة النازعات..الآيات من 27 الى 29 وتفسيرهم

اليوم الثامن: سورة النازعات..الآيات 30 الى 33 وتفسيرهم

اليوم التاسع: سورة النازعات..الآيات من 34 الى 36 وتفسيرهم

اليوم العاشر: سورة النازعات..الآيات من 37 الى 41 وتفسيرهم

اليوم الحادي عشر: سورة النازعات..الآيات من 42 الى 46 وتفسيرهم

على فكرة الموضوع مش بيأخد أكثر من 10 دقائق في اليوم..وده وقت متاح لكل واحد فينا حتى لو كان بيشتغل..فحاولوا تتشجعوا وتبدأوا تحفظوا القرآن وحاولوا تشجعوا اللي حواليكم انهم يحفظوا معاكم..

صناعة التطرف في مصر..

انتشر خبر عن مقتل شاب على ايدي 3 ملتحيين أثناء توصيله لخطيبته وملخص الخبر ان 3 ملتحيين يرتدوا جلاليب بيضاء اوقفوا الشاب وهو مع خطيبته وسألوه ليه ماشي معاها فلما اعترض على سؤالهم طعنوه..طبعا كل الكلام ده مجرد خبر ولسه متفتحش تحقيق عشان نعرف ايه سبب طعنهم للشاب وهل الجريمة ارتكبت بسبب دافع ديني واللا لأسباب أخرى..

لكن الغريب لما تطلع صفحة هيئة الأمر بالمعروف والنهي عن المنكر بمصر وتهلل للخبر وتفرح وكأن ده أول تنفيذ لنشاطها لمصر..وده اللي كتبوه تحديدا على صفحتهم..

ولم تكتفي الصفحة بالتهليل لخبر مقتل الشاب لكن قامت بنشر بيان لها يتضمن روايتهم عن الحادثة ويؤكد صلتهم بالحادثة..

وقبل ما حد يشتم في الاسلاميين أو حد يقول ده الاعيب الأمن..خلينا نقول اننا منعرفش مين اللي بيدير الصفحة ده..خاصة انه كان دار عليها جدل كبير من حوالي 7 شهور وحتى الأحزاب الاسلامية نفت صلتها بالصفحة ده وانتقدتها كمان..وأنا كنت كتبت تدوينة مجمع فيها افكار انتقادات الاسلاميين للصفحة وكتبت فيها عدة تساؤلات للأمن..وده لينك للتدوينة هيئة الأمر بالمعروف..الداعين ليوم 25 يناير كالداعين للرذيلة لكن سننضم الى كتائب القصاص!!

المكرر في التدوينة ده والتدوينة السابقة اللي كتبتها عن نفس الصفحة هي نفس التساؤلات..ليه الأمن سايب صفحة بتدعو لأفكار متطرفة وقعدت تغري الشباب العاطل بمرتبات ثابتة في مقابل تكوين حركة مسلحة في شوارع مصر؟!

طول السنيين اللي فاتت وحتى بعد الثورة واحنا بنشوف الأمن بيعتقل شباب وبيفتح تحقيق معاهم لمجرد انهم كتبوا كلمة على الفيس بوك أو تويتر..لكن الغريب اننا نلاقي الأمن سايب الصفحات اللي بتدّعي انها دينية وبتنشر افكار متطرفة على الانترنت وتخلق فتنة في المجتمع..والسؤال للمرة الثانية ليه الأمن موقفه سلبي تجاههم؟!

ليه مفيش تحقيق من الأمن عن الصفحات اللي بتدّعي انها دينية ويقبض على اللي بيديرها ويحقق معاهم ويعرف ايه نواياهم أو على الأقل نلاقي تحقيق جاد عن الموضوع ونعرف اذا كان اللي بيدير الصفحات ده من داخل مصر أو خارجها و هل هم أشخاص متطرفين فعلا واللا ناس قاصده تعمل فتنة داخل المجتمع المصري وتشجع على العنف..

في النهاية الموضوع مينفعش يتسكت عليه..واللي بيحصل ده صناعة للتطرف داخل مصر وده فعلا اللي بيهدد استقرار المجتمع..ومينفعش تشوف ناس بتخرب المجتمع وبتنشر فيه افكار متطرفة وتقف تتفرج عليه او تأخد موقف سلبي..وزي ما قلت في التدوينة الأولى باكرر في الثانية..لازم نكون مجتمع قوي لأننا احنا اللي حنحدد شكل المجتمع اللي عايزين نعيش فيه..ومحدش حيقدر يجبرنا على تغيير شكل مجتمعنا..المهم اننا نواجه أي مشكلة بتظهر في مجتمعنا.

مرسي..بين خطاب ثوري واعلان دستوري مكمل

يوم الجمعة 29/7/2012 كان يوم تاريخي فعلا في تاريخ مصر والوطن العربي..تقريبا ده أول مرة يقف رئيس عربي منتخب في ميدان مفتوح ليوجه خطاب لشعبه ومؤيديه..وبالتالي ف المشهد مش بس جديد على مصر لكن على الوطن العربي كله اللي اتعود انه الملك أو الرئيس شخص مفروض عليه وبينهم وبينه ألف باب وسور..ففجأة الناس شافت رئيس لأول مرة يأتي بارادة الشعب ويقف وسطهم دون خوف ويوجه خطاب لهم..

لاشك ان الفترة اللي بنعيشها لها ايجابيات كثير ويبقى شخص غير عادل اللي يتجاهل هذه الايجابيات..لكن برضه فيه سلبيات كثير ويبقى شخص مغيّب من يتجاهلها..

خلينا نبدأ الايجابيات اللي شفتها من وجهة نظري في خطاب مرسي..والخطاب مكنش مجرد خطاب ثوري لكسب ود المصريين لكن كان فيه رسائل للقوى السياسية والمؤسسات داخل مصر وكمان كان فيه رسائل للخارج..خلينا نرصد بعض منها..

• نزول الرئيس المنتخب في وسط مئات الملايين ليوجه كلمة لهم ده في حد ذاته تصرف ايجابي من مرسي وفي نفس الوقت هي رسالة بيوجهها للمجلس العسكري ان فيه ملايين بتؤيده وبتدعمه وفي نفس الوقت هي رسالة للغرب ان فيه مصر رئيس منتخب يحظى بشعبية وتأييد الملايين من الشعب وده حيكون له مردود ايجابي سياسيا واقتصاديا.
• اداء مرسي تطور بشكل كبير وده كان متوقع لأن طبيعي ان رئيس الدولة بيكون له مساعدين بيوجهوه ازاي يوجه خطاب للشعب وبيساعدوه في كتابة الخطاب ومرسي كمان حاول في اوقات كثير انه مش بس يعتمد على التقرب للناس ببعض الكلمات لكن ايضا بحركات ايديه وبالوقوف في مقدمة المنصة وابعاد الحراسة وتأكيده انه لم يلبس واقي للرصاص..كل ده مشاهد عشان يبين للناس انه قريب منهم ويكسب ودهم..وده أثرت في الناس بلا شك..
• تأكيد مرسي بصفته رئيس للدولة على ان مصر دولة مدنية دستورية وكررها أكثر من مرة على ما اعتقد في خطابه ده كانت رسالة واضحة للقوى السياسية في مصر وللغرب ان مصر ستكون دولة مدنية ويكذب الشائعات ان الاخوان حيحولوا مصر لدولة دينية ونصبح كدولة مثل ايران او افغانستان.
• توجيهه التحية للعاملين في السياحة والاعلام والفن هي برضه كانت رسالة لطمأنة الناس ان هوية مصر لن تتغير وحتى حاول مرسي قراءة بيت من الشعر لويضح للناس انه مش ضد الفن.
• وبالنسبة لعلاقات مصر الخارجية فزي ما طمأن الثوار ان مصر لن تكون تابعة لأي دولة أخرى..كان فيه طمأنة للغرب انه سيسعى للسلام ولن يعتدي على اي دولة (ومعروف ان خوف الغرب ان مصر تدخل في حرب مع اسرائيل) وكمان أكد انه حيسعى لتدعيم علاقات مصر مع افريقيا والدول العربية والغرب بشكل عام.

لكم بجانب الايجابيات..فيه بعض الحقائق لازم نأكدها من دلوقتي عشان منصدمش بعد كده ونعمل وكأننا مكناش نعرف..

• قبول مرسي لحلفان القسم أمام المحكمة الدستورية هو بمثابة موافقة على الاعلان الدستوري المكمل وكافة المواد الموجودة فيه.
• بعد قبول الاعلان الدستوري لن يستطيع مرسي "الرئيس المنتخب" من تعيين وزير للدفاع..لكن حيفرض عليه طنطاوي ولن يستطيع اجراء اي تغيير في المجلس العسكري..فهل من المقبول ان رئيس الدولة المنتخب من ملايين من الشعب لا يستطيع تغيير وزير في حكومته؟!
• بعد قبول الاعلان الدستوري حيصبح للمجلس العسكري بشكل رسمي تولي السلطة التشريعية واقرار الموازنة وهنا حيبقى السؤال المهم ايه الضمان ان المجلس العسكري لن يعوق قرارات الرئيس المنتخب او الحكومة الجديدة؟ّ! يعني زي ما كان بيحصل مع عصام شرف وكانت النتيجة رفض المجلس العسكري لتشريع اي قوانين تضمن استقلال القضاء او حرية انشاء النقابات..او حتى تعديل الموازنة لخفض دعم الطاقة لبعض الصناعات.
• قبول الاعلان الدستوري حيصبح من حق المجلس العسكري التدخل في الدستور والزام الجمعية التأسيسية بتغيير أي مادة تعترض عليها القوات المسلحة في خلال 15 يوم ولو اصرت التأسيسية على عدم تعديلها سيتم ارسال المادة للمحكمة الدستورية للبت في امرها وحيصبح قرار الدستورية ملزما.
• بعد قبول الاعلان الدستوري حيبقى من حق المجلس العسكري تشكيل الجمعية التأسيسية في حالة حل الجمعية التأسيسية الحالية..وطبعا في الوقت الحالي فيه قضية مرفوعة على الجمعية التأسيسية ومنتظرين الحكم فيها..وبالتالي ف ممكن بعد شهور نلاقي المجلس العسكري بيشكل جمعية تأسيسية من اعضاء يختارهم بنفسه وممكن حتى الجمعية التأسيسية اللي بيشكلها المجلس العسكري تضع مادة في الدستور لاعادة انتخابات الرئاسة وبالتالي فممكن فترة رئاسة مرسي وحكومته لا تستمر الا شهور وبعد كده نرجع تاني ننتخب رئيس من جديد يشكل حكومة جديدة.

الخلاصة ان الاعلان الدستوري المكمل زي ما ممكن فيه ناس تعتبره حماية لمدنية الدولة او ان الظروف الحالية تخلينا نقبل به بشكل مؤقت لكن برضه ممكن يستخدم لتعويق مهام الرئيس والحكومة ويتسبب في حالة عدم الاستقرار..كمان وجود سلطة للعسكر أكبر من سلطة الرئيس المدني وتدخلهم في كتابة الدستور الجديد ده في حد ذاته يخلينا نقلق من شكل الدستور الجديد..هل العسكر اللي توغلوا في كل مؤسسات الدولة ويمتلكوا حوالي 30-40 % من اقتصاد مصر حيقبلوا اننا نكتب دستور جديد يقلل من نفوذهم في مؤسسات الدولة ويقبل تدخل ورقابة على الاقتصاد اللي بيضع يده عليه؟! 

من الأن يجب على مرسي ان يتعامل على انه رئيس منتخب من الشعب ولا يكرر مأساة عصام شرف مرة أخرى..فكرة انه يمسك العصايه من النص زي ما عصام شرف حاول يعمل قبل كده لعدم خلق اي ازمات ده حيبقى فشل كبير له..مينفعش يروح التحرير ليرضي الثوار في مليونية هي اصلا ضد الاعلان الدستوري وتاني يوم يقبل الاعلان الدستوري المكمل..لازم يكون فيه وضوح لمواقف مرسي في الفترة القادمة..لأن ميدان التحرير حيكون هو الوسيلة الوحيدة قدامه لو حاول العسكر تعويق مهمته في استكمال اهداف الثورة.

احفظ كل يوم آية واعرف معناها

السلام عليكم..

غالبا احنا أكثر شعب بيقول على نفسه متدين وتلاقي ده مش بينعكس في سلوكياته وتصرفاته..ده غير الفضيحة بقى لما تلاقي حد قاعد بيفسر آيات للقرآن على مزاجه..

كمان عيب أوي لما نكبر في السن ويفضل كل اللي حافظينه من القرآن بعض السور القصيرة والآيات عشان نصلي بها..ونفكر نقرأ القرآن في رمضان بس..

عامة الفكرة جاتلي من صفحة على الفيس بوك كانت ناشره عدد الأيات اللي تحفظها في اليوم والمدة اللي حتحتاجها لحفظ القرآن كامل..وطلع ان الواحد لو حفظ آية واحدة في اليوم يبقى بعد 17 سنة حيكون حفظ القرآن كله..أيوة 17 سنة ممكن يبقى مدة طويلة لكن ما أنا مثلا عندي 25 سنة..يعني لو كنت بدأت احفظ آية واحدة في اليوم من وأنا عندي 6 أو 7 سنين كان زماني حافظ القرآن كله دلوقتي..

كل الفكرة اننا نبدأ من دلوقتي وكل واحد يشجع اخواته واصحابه انهم يحفظوا معاه القرآن ويتفقوا يحفظوا آية واحدة في اليوم أو عدد من الآيات على حسب طول الآية..المهم متحاولوش تصعبوا الموضوع على نفسكم عشان متكسلوش..وطبعا تخيل انك لو حفظت آية واحدة في اليوم فأنت كل سنة كده حتحفظ 365 آية..ده طبعا افضل بكثير من انك تقعد 25 سنة وكل اللي حفظته عدد من السور القصير..صح؟

المهم كمان ان أي عدد من الآيات حتحفظها حاول تعرف معناها..وعامة عشان أسهل الموضوع عليكم أكثر فحاكتبلكم موقعين تقدروا تحفظوا منهم القرآن وتلاقوا التفسير كمان للآيات..

http://www.e-quran.com/default.html

http://quran.ksu.edu.sa/

وبما اني سبقتكم وبدأت حفظ القرآن وبدأت بالجزء الثلاثين والحمد لله حفظت سورة النبأ (40 آية) في 10 أيام بس وحسيت ان الحفظ كان سهل جدا ف حاكتبلكم لينكات فيها الآيات اللي حفظتها كل يوم وتفسيرها..

اليوم الأول: أول 5 أيات من سورة النبأ وتفسيرهم

اليوم الثاني: سورة النبأ..الأيات من 6 الى 9 وتفسيرهم

اليوم الثالث: سورة النبأ..الأيات من 10 الى 13وتفسيرهم

اليوم الرابع: سورة النبأ..الأيات من 14 الى 16وتفسيرهم


اليوم الخامس: سورة النبأ..الأيات من 17 الى 20 وتفسيرهم


اليوم السادس: سورة النبأ..الأيات من 21 الى 26 وتفسيرهم


اليوم السابع: سورة النبأ..الأيات من 27 الى 30وتفسيرهم


اليوم الثامن: سورة النبأ..الأيات من 31 الى 35 وتفسيرهم


اليوم التاسع: سورة النبأ..الأيات من 36 الى 38 وتفسيرهم


اليوم العاشر: سورة النبأ..الأيات من 39 الى 40 وتفسيرهم

والمهم ان كل شوية تراجعوا على الآيات اللي بتحفظوها وتحاولوا تصلوا بها..ولما تخلصوا حفظ السورة تحاولوا تخلوا فيه يوم أو اثنين تقرأوا فيها السورة فيهم كذا مرة عشان متنسوهاش..

يلا ربنا يقويكم ويثبتكم على فعل الخير..

مسرحية الانتخابات الرئاسية

بما اننا قاعدين كلنا منتظرين نشوف اللجنة العليا للانتخابات ونسمع منهم مين اللي فاز في الانتخابات الرئاسية..وقاعدين كل شوية نشوف مرسي وحملته بيحتفلوا ونقلب على قناة تانية نشوف شفيق وحملته بيحتفلوا ومبقاش حد عارف مين فيهم اللي صادق في كلامه..فخليني اقولكم شوية افكار واستنتاجات خاصة بيّ للي بيحصل (وزي ما باقول استنتاجات مش معلومات)..

• العسكر مش حيسلم السلطة قبل 2013 (زي ما كان عايز في الأول قبل ما نضغط عليه) والسبب انه عايز يستنى لما الدستور يتكتب ويطمئن على وضعه في الدستور ويحمي الاقتصاد اللي تحت ايديه.
• في اعتقادي ان العسكر مشاركش في تزوير الانتخابات وهو اصلا مش عايز يبقى فيه اي تزوير يغيّر النتيجة..وده لسبب بسيط ان اي حالات تزوير ضخمة حتقلب عليه الدنيا وحتهيّج الناس وهو مش عايز ده يحصل واتعلموا من غلطة مبارك في انتخابات البرلمان 2010.
• العسكر حب يأمن نفسه بالاعلان الدستوري المكمل وده كان البديل بالنسبة له عشان يضمن انه حيستمر في الحكم لغاية ما الدستور يتكتب..وحتى كانوا قاصدين التوقيت اللي يعلنوا فيه عن الاعلان الدستوري المكمل بحيث انه ولا يبقى قبل الانتخابات فيخلي الناس تقاطع الانتخابات وتنزله في الميادين.
• العسكر بعد الاعلان الدستوري ميفرقش معاه مين يكسب..سواء شفيق أو مرسي..هو أمن نفسه خلاص..لأنه احتفظ لنفسه سلطة التشريع واقرار الموازنة واعلان الحرب والتدخل في كتابة الدستور والاعتراض على أي مواد فيه وتغييرها..ده حتى ادى لنفسه الحق في اعادة تشكيل الجمعية التأسيسية لو تم حل الجمعية الحالية..وبرضه بالاعلان الدستوري ضمن ان الرئيس القادم مش حيقدر يغيّر في تشكيل المجلس العسكري..من الأخر يعني الرئيس القادم صلاحياته محدوده جدا ومش حيقدر يعمل حاجة دون الرجوع للعسكر..والمجلس العسكري حيبقى في ايده انه يعجز الرئيس المنتخب عن اتخاذ اي قرار ميجيش على مزاجهم.
• الرئيس القادم "المنتخب" حيقوم بنفس الدور اللي قام به عصام شرف بعد استقالة أحمد شفيق من رئاسة الحكومة..وده اللي يخليني اقول ان فوز محمد مرسي أفضل للعسكر من فوز شفيق..وده مش اهانة لمحمد مرسي أو الاخوان..لكن لأن الاخوان محسوبين على الثورة زي كده ما عصام شرف كان محسوب على الثورة..وبالتالي لو نجح مرسي حيضمن ان الاخوان حينسحبوا من الميدان ومش بس كده ده حيحاولوا يهدوا الناس (زي ما حصل بعد انتخابات البرلمان) وكمان بقية التيارات السياسية حتهدى وتعتبر ان الثورة انتصرت بابعاد شفيق (الفلول) وعزله شعبيا من الانتخابات..وفي كل الاحوال المجلس العسكري أمن نفسه بالاعلان الدستوري فعارف ان مفيش أي خطورة عليه لو مرشح محسوب على الثورة وصل للحكم.
• المجلس العسكري حيكسب وقت وحيمشي على خريطة جديدة لانتقال السلطة..دستور (يكون المجلس العسكري راضي عنه) ثم انتخابات برلمانية ثم اعادة الانتخابات الرئاسية وبالتالي ف احنا قدام فترة انتقالية 6 شهور أو اكثر زي المرة اللي فاتت بس اتغير فيها الترتيب والدستور المرة ده حيسبق انتخابات البرلمان والرئاسة.
• بالنسبة بقى للاحتجاجات والمظاهرات اللي حتحصل في الفترة اللي حيقعدها زيادة..فكمان المجلس العسكري قدر يمتص غضبنا واحنا ساعدناه لما حبسنا نفسنا في الميادين..فهو عارف انه مهما عمل ف احنا حنجري على الميادين ونطلع غضبنا فيها ونروح بيوتنا تاني..وحتى الميادين بقت مترشقه مخبرين وتحريات وعيال مزقوقه عشان يفضلوا حتى مسيطرين على الميدان من جواه.

الخلاصة بقى اننا في مسرحية..العسكر لعبها من البداية واللي ساعدوا في انجاحها النخبة السياسية بمختلف ايديولوجياتها سواء ليبرالية أو اسلامية..وقدر يضحك عليهم..بيجتمع مع كل طرف منهم ويفهمه ان وجوده هو حماية له عشان الطرف الأخر ميستفردش بالحكم..فيقعد مع الاسلاميين ويضحك عليهم بالانتخابات وهم بيصدقوا لأنهم عارفين انهم القوة الوحيدة المنظمة على الأرض..وبعد شوية يقعد مع بقية النخبة والاحزاب ويطمئنهم ان وجوده هو حماية للدولة المدنية من الاسلاميين اللي عايزيننا نبقى ايران وافغانستان..والمسرحية مستمرة طول ما عندنا نخبة (بمختلف ايديلوجياتها) غبية وراضية انها تقعد تعمل صفقات مع العسكر بدل ما تنضم للشارع وتوحد مطالبها ومواقفها وتتشارك في السلطة..

مشاركة أم مقاطعة؟!

فاضل أقل من 48 ساعة على أول انتخابات رئاسية في مصر من بعد الثورة..

وبما ان انقسمت الأراء بين مشارك في الانتخابات ومقاطع لها..فخلينا نفكر في ايجابيات وسلبيات كل قرار منهم..

مبدأيا أنا متفهم جدا رأي المقاطعين للانتخابات ومحترم وجهة نظرهم..لكن كل هدفي هو التفكير في جدوى المشاركة وجدوى المقاطعة..

تفتكروا المقاطعة ممكن توصلنا لأيه؟! هل مثلا لو قدرنا نقنع مليون واحد انهم يقاطعوا الانتخابات..طب ما فيه 20 مليون أو اكثر حيشاركوا..يعني برضخ ساعتها حيتقال ان الانتخابات عبرت عن رأي الشعب واختياره..أيوة زي ما اتقال كده في انتخابات البرلمان اللي بعضنا قرر يقاطعها وافترض انها حتتزور..وفي النهاية اللي فاز فيها هو اللي استعد لها وحشد اصوات الناس لمرشحيه..

كنت كل ما بانزل مظاهرة ونهتف بحق الشهداء ومحاكمة القتلة ورموز الفساد..باقعد اقول يعني ينفع نطالب واحد انه يحاكم نفسه؟!..أو مثلا متوقعين ان شخص من نفس النظام حنطالبه باسقاط النظام الفاسد ده وبناء نظام جديد؟! مستحيل طبعا..وبرضه حيفضل مستحيل لو اللي فاز في انتخابات الرئاسة مرشح من نفس النظام (شفيق أو عمرو موسى).. طب السؤال بقى هل بمقاطعتنا للانتخابات ده حيخلي العسكر يرحل؟ طب هل بالمقاطعة حنمنع وصول شفيق أو عمرو موسى لكرسي الحكم؟!

طب سيبكم من كل اللي قلته ده..هل فيه خطوات واضحة بعد قرار المقاطعة؟! يعني لو كلنا قررنا نقاطع الانتخابات حنعمل ايه بعد كده!! حننقل السلطة من ايد العسكر ازاي؟! ومين اللي حيستلم السلطة؟! وهل لو كل اعتراضنا على اجراء الانتخابات تحت حكم العسكر طب مين اللي يتولى مسئولية اجراء الانتخابات..رئيس مجلس الشعب مثلا اللي هو عضو في حزب له مرشح في نفس الانتخابات؟! واللا رئيس المحكمة الدستورية اللي هو دلوقتي رئيس لجنة الانتخابات؟! واللا مثلا حنقرر ننتخب مجلس رئاسي تحت حكم العسكر عشان يتولى المجلس ده اجراء انتخابات الرئاسة؟!

حتقوللي طب حتضمن منين ان العسكر حيسلم السلطة بعد ما يبقى عندنا رئيس..حاقولك ببساطة احنا في الحالتين حنكون كسبانين..والله لو المجلس العسكري سلم السلطة فعلا للرئيس يبقى احنا وصلنا لهدف من اهدافنا اللي حيساعدنا في اكمال ثورتنا..ولو العسكر رفض يسلم السلطة احنا برضه حنبقى الكسبانين..لأن العسكر طول الوقت كان بيقنع الناس انه حيرحل خلاص وان الشباب اللي بينزلوا الميادين يهتفوا بسقوط حكم العسكر هم المخربين اللي عايزين يمنعوا انتقال السلطة..ولو احنا كنا بنقول ان الاستفتاء ده هو اللي منح العسكر الشرعية يبقى بالانتخابات الرئاسية حننتزع منه الشرعية ده..وساعتها لو رفض يسلم السلطة مش حنحتاج اننا نبذل مجهود في حشد الناس ضده..

طب حتشارك ليه خاصة لو انت مش مقتنع بأحد المرشحين؟! طبيعي انك متلاقيش ولا مرشح متفق مع افكارك 100%..لكن المهم اننا نحشد أصواتنا لأحد المرشحين المؤيدين للثورة..وده مش معناه اننا لو انتخبنا أبوالفتوح أو حمدين مثلا يبقى الثورة نجحت وحققنا كل اللي احنا عايزينه..لكن الفكرة اننا حنختار حد كان بينزل الميدان يطالب بنفس مطالبنا..ويوم ما يوصل للحكم حيكون الضغط عليه لتحقيق مطالبنا أسهل بكثير من لو اللي وصل للحكم واحد من نظام مبارك..

لو مشكلتنا في نزاهة الانتخابات..فمشاركتنا فيها بالملايين حيمنع تزويرها وده مش كلام نظري..ومراقبتنا الشعبية على لجان الانتخابات  سواء برصد أي تجاوزات من داخل اللجان وده حيقوم به مندوبين المرشحين ومنظمات المجتمع المدني وكمان مراقبتنا الشعبية كناخبين حنرصد ونصور أي تجاوز بيحصل خارج اللجان أو داخلها واحنا بندلي بأصواتنا..وسهل أوي اننا نقدر ننشر أي تزوير وده حيكون كاف انه ينزل الناس الشارع من تاني..

كل الفكرة ان الناس شايفه ان الانتخابات هي الحل لانتقال السلطة..ف لو قدرنا فعلا ننقل السلطة عن طريق الانتخابات لرئيس مؤيد للثورة..حنبقى أخدنا خطوة نكمل بها ثورتنا..ولو اثبتنا للناس ان الانتخابات اللي شايفنها الحل بتتزور أو ان المجلس العسكري غير جاد في انتقال السلطة..حنكسب غضب الناس وثورتهم..

في النهاية أنا مع المشاركة في الانتخابات..لكن باحترم قرار المقاطعون حتى وأنا ضده..ومش حاقول ان تصرفهم سلبي زي ما البعض بيقول..أنا بس شايف ان المكسب من المشاركة في الانتخابات اكبر من مقاطعتها..

قطع المعونة..فيلم الموسم وكل موسم

فيلم قطع المعونة الي بنسمع عنه كل فترة كده من ايام مبارك لغاية دلوقتي بقى فيلم سخيف جدا ولسه الاعلام بيلعب دور انه يقنع الناس ان قطع المعونة معناها اننا نموت من الجوع..

أولا ان المعونة تتقطع ده مش في مصلحة امريكا..لأن المعونة جزء من اتفاقية السلام بين مصر واسرائيل وقطع المعونة معناها اخلال بجزء من الاتفاق وده حيسمح لمصر انها كمان تعدّل ف الاتفاقية زي ان جيشنا يبقى له تمركز في سيناء بدل ما احنا اخرنا بعد قناة السويس بشوية

ثانيا اغلب المعونة هي مساعدات عسكرية..يعني احنا بنأخد بفلوس المعونة سلاح..ومعروف ان السلاح اللي بنأخده من امريكا اقل من اللي امريكا بتعطيه لاسرائيل..ده غير ان المعونة بتلزمنا اننا نشتري سلاحنا من امريكا بس وبتلزمنا اننا نستعين بخبراء امريكيين..ده غير انه بيتقال ان جزء من السلاح اللي بنشتريه حتى بيفضل في مخازن امريكا وبتوعدنا اننا لما ندخل حرب تبقى تديهولنا(اكيد طبعا حتديهولنا لو بنحارب دولة عربية او ايران مش لو حاربنا اسرائيل)

ثالثا لو حد متابع المؤتمر اللي بيعمله اي رئيس امريكي مع الصهاينه ف امريكا قبل الانتخابات حتلاقوه لازم يكرر لهم ان دوره الحفاظ على التفوق الاسرائيلي ف الشرق الأوسط وده يوضح النقطة السابقة..طالما ف ايد امريكا التحكم ف تسليح مصر (الدولة اللي ممكن تهدد امن اسرائيل) يبقى سهل انه يفضل يخلي اسرائيل اقوى من مصر

رابعا فيلم قطع المعونة سمعناه كثير وبعد كل مرة بنلاقي اتفاقية جديدة بين مصر واسرائيل مرة اتفاقية تطبيع..مرة تصدير غاز..مرة حصار غزة..وهكذا

أخيرا امريكا كل فترة بتحب تفكر المصريين ان رقبتنا تحت ضرسهم..ومبارك والعسكر من بعده بيحبوا يبانوا ان امريكا بتكرهم عشان يخلوا الشعب يحبهم ويعجب بهم..

ملحوظة أخيرة..أوباما طلب من الكونجرس الحفاظ على حجم المساعدات السنوية المقدمة الى مصر  ..اعتقد ده يبين ان امريكا هي اللي عايزه المعونة تستمر مش احنا اللي بنترجاهم ميقطعوهاش احسن حنموت من الجوع

هيئة الأمر بالمعروف..الداعين ليوم 25 يناير كالداعين للرذيلة لكن سننضم الى كتائب القصاص!!

كنت اتصفح صفحة هيئة الأمر بالمعروف والنهي عن المنكر وكنت عايز اقرأ كلامهم واعرف طريقة تفكيرهم قبل ما اكتب عنهم..لكن لقيت بيانين كتبوا على هذه الصفحة رأيت انهم متناقضين جدا..أولهم كان على دعوة التظاهر في يوم 25 يناير القادم وكان رأيهم انهم رافضين للنزول في هذا اليوم لما سيكون في هذا اليوم -ده من وجهة نظرهم- مفاسد وخروج على ولي الأمر وقالوا ان المشاركين فيها كالعازمين على ارتكاب المنكر والداعين لها كالداعي للرذيلة..

فمن الواضح من كلامهم انهم ضد الخروج على الحاكم وبيحرموا ده..الغريب كان فيه بيانهم السابع..اللي اكدوا فيه دعمهم وتضامنهم مع أسر شهداء 25 يناير في مدينة السويس  وانهم على استعداد الى الانضمام ل (كتائب القصاص) المزمع تكوينها لانفاذ شرع الله فيما ثبت تورطهم في ارتكاب كبيرة القتل من ضباط وزارة الداخلية !!

الغريب ان لو انت ضد الخروج على الحاكم يبقى ازاي انت حتضامن وكمان مستعد انك تشارك في القصاص من قتلة اللي شاركوا في يوم 25 يناير 2011 برغم انهم كانوا خارجين على الحاكم برضه!!!


فيه غموض في موضوع هذه الهيئة ففي البداية كانوا يأخذون من شعار حزب النور شعارا لهم وبعد كده تبرأ منهم حزب النور واعلنوا انه لا علاقة لهم بالصفحة الموجودة على الفيس بوك ووصل الأمر ان نادر بكار المتحدث الرسمي لحزب النور اتكلم في برنامج القاهرة اليوم وقال لو شفتم حد بخرزانه سلموه للشرطة

الفكرة ان رفض السلفيين والتيارات الاسلامية لهذه الحركة لم يتوقف عند حزب النور فقط..لكن كان برضه فيه تصريح ناجح ابراهيم القيادي في الجماعة الاسلامية:وزير الداخلية هو أمير المحتسبين ! وقال انه لا مجال نهائيا لتطبيق هذا الفكر..

ثم جاء تصريح عبد المنعم الشحات بأنه يرفض دعوات انشاء هيئة أمر بالمعروف إسلامية أو مسيحية..


اللي واضح لنا ان كل التيارات الاسلامية بتخلي مسئوليتها عن هذه الهيئة وكلهم بيرفضوا تطبيق الفكرة..وده اللي يخلينا نسأل..هو مين اللي بيدير هذه الهيئة في مصر؟؟ وايه اللي مخلي الأمن سايبهم كده يطلبوا متطوعين وينزلوا ببيانات تغري الشباب العاطل بان من ينضم لهم حيكون له مرتب شهري 500 جنيه؟؟

اللغز بقى مش مين اللي ورا الصفحة بس..اللغز هو ليه الداخلية لغاية دلوقتي متحركتش..رغم ان لسه الهيئة او الجماعة ده لسه بتتكون والسيطرة عليها حيكون اسهل من الانتظار لغاية ما ينضم لها متطوعين وعددها يكبر وينتشروا في كل المحافظات..ولو الداخلية محتاجه اسباب للقبض على مؤسسي الصفحة والتحقيق معهم فالأسباب موجوده وواضحة في البيان السابق تكوين جماعة مسلحة - تمويل مجهول الهوية - الخروج على القانون - ارهاب الناس..وده يحط علامات استفهام حول موقف الداخلية من هذه الصفحة حتى الأن..

أول ما فتحت صفحة هذه الهيئة قلت لو كان الهدف منها تخويف الناس فأكيد في خلال ايام حنسمع عن حادث ويتم نسبه لهذه الهيئة وقد كان..بعدها بأيام قرأت عن ان اعضاء في الهيئة دخلوا على حلاق يطالبوه بعدم حلاقة الذقن وخبر اخر عن دخولهم محل كوافير وتصدي السيدات لهم..والغريبة بقى ان برغم سهولة التقاط الصور والفيديوهات عن طريق الموبايل الا ان مفيش ولا صورة ولا فيديو واحد تم اضافتها لأي من الخبرين!!


التساؤل الأخير بقى..هل هيئة الأمر بالمعروف والنهي عن المنكر هي الفزاعة الجديدة اللي المفروض تخوّف المصريين؟؟!!


في كل الأحوال من المفترض اننا منخافش من هذه الهيئة سواء كانت حقيقة او مجرد محاولة لتخويفنا..ومن المفترض المجتمع يظهر قوي قدام هذه الفزاعات لأن المجتمع هو اللي المفروض يحدد النظام اللي عايز يعيش فيه..لو المجتمع يقبل بوجود هذه الهيئة فده اختياره لكن لو رافض لها فمفيش حد ممكن يجبره على وجودها..

في النهاية ده فيديو للأميرة بسمة بنت الملك سعود بن عبد العزيز ال سعود الذي انشأت في عهده هيئة الامر بالمعروف والنهي عن المنكر في السعودية وتوضح اسباب انشائها وكيف تغيرت مهامها عن الأسباب الأساسية لانشائها واصبحت تشكل ارهابا دينيا واجتماعيا على حد قولها..